أي حد بينجذب عاطفيًا أو جنسيًا للستات والرجالة فهو بايسكشوال. وده المسمى اللي بيقوله معظم الناس أو ممكن يستخدموا مسميات تانية ولكن أقل زي «مزدوجي التوجه الجنسي» مثلاً وحاجات تانية.
الناس البايسكشوال كتير أوي
الناس البايسكشوال يعتبروا أكتر ناس في مجتمعات الميم عشان عدد البايسكشوال كبير جدًا. في ناس بتقول كمان إن عددهم أكبر من الناس المغايرين. لإن أغلب البشر بايسكشوال. وفي عدد كبير من الناس مبيكونوش عارفين إنهم بايسكشوال عشان مفيش معلومات وحاجات تساعد الناس يعرفوا هويتهم الجنسية كويس. والمجتمع كمان بيفرض المغايرة الجنسية على كل الناس وبيسمحش بأي ظهور لأي ميول جنسية تانية.
الدكاترة والناس البايسكشوال
الناس البايسكشوال طبيعيين وميولهم الجنسية طبيعية. وغالبًا الدكاترة اللي بيقولوا إن المثليين مرضى مبيتكلموش على الناس البايسكشوال. عشان لو اتكلموا عنهم أو حاولوا يسقطوا عليهم الخرافات اللي بيقولوها على المثليين هتفشل وهيبان قد ايه هما بيكدبوا.
كراهية البايسكشوال
في ثقافة غلط منتشرة في المجتمع كله وحتى عند ناس من مجتمعات الميم بردو حوالين الناس البايسكشوال. الثقافة دي بتستند لصور نمطية ومعلومات مش دقيقة وأحكام مبنية على تجارب فردية أو افتراضات عامة زي إن الخيانة في العلاقات منتشرة وسط الناس البايسكشوال. يعني كل الناس ممكن تخون وكل الناس ممكن تتصرف بشكل مش كويس تجاه بعضها بغض النظر عن ميولهم الجنسية.
والكراهية دي بتقمع الناس البايسكشوال. وبتحسسهم إنهم مش مرحب بيهم في أي مكان أو مساحة سواء وسط الناس المغايرين أو وسط مجتمعات الميم.
