أطياف

يعني إيه ترانس؟

عشان في الوقت الحالي في أسئلة كتير بتتسأل عن الترانس، جمعنا إجابات على الأسئلة دي.

يعني إيه ترانس؟

الشخص الترانس هو أي شخص إحساسه الداخلي بجنسه مختلف عن الجنس اللي اتحدد له ساعة ما اتولد، زي الشخص اللي بيتولد بأعضاء تناسلية أنثوية مثلا بس هو بيشوف نفسه راجل.

الترانس موجودين فين؟

الترانس موجودين في كل بلد وكل مكان على وجه الأرض، وجودهم مش مرتبط ببلد معينة أو مكان معين، وكمان الترانس موجودين في كل دين، وفي كل لون، وفي كل ثقافة بشرية.

الترانس ظهروا امتى؟

الناس الترانس ماظهروش في وقت معين، عشان دايمًا الناس الترانس كانوا موجودين، في كل الأزمان المختلفة، اللي جد بس إن الطب اتطور والترانس اللي عاوزين يدخلوا في الإجراءات الطبية يقدروا يعملوا ده بشكل أسهل.

هل الترانس حرام في الإسلام؟

ﻷ، الأدلة المتعلقة بتحريم الترانس في الإسلام ضعيفة، والأزهر في مصر أصدر فتاوى لصالح أشخاص ترانس لإجراء العمليات الجراحية.

فيه تفاصيل أكتر في (الإسلام وقضية الترانس) هنا.

هل فيه ترانس معروفين في مصر؟

حنان الطويل تعتبر أول ممثلة مصرية ترانس، اشتهرت في أدوار كوميدية في أعمال متنوعة وقليلة، أدوارها علقت مع الناس بسبب روحها ودمها الخفيف، هي ميس انشراح في فيلم “الناظر” والست كوريا في فيلم “عسكر في المعسكر”، وهي عزيزة في 55 إسعاف، اتعرضت حنان الطويل للهجوم من جيرانها بسبب إنها ترانس، وده اتسبب في احتجازها في مستشفى العباسية للأمراض العقلية، وماتت هناك، الأقاويل حول سبب موتها تعددت، ولكن المرجح إنها اتنحرت.

هل الترانس موجودين في التاريخ العربي والإسلامي؟

العرب كانوا بيستخدموا مصطلح “مخنث” لوصف الذكور بيولوجيا اللي كانت عندهم صفات أنثوية، والروايات التاريخية عن اللي كان بيطلق عليهم المخنثين بتوضح عند بعضهم ميول للعبور الجنسي من رجال إلى نساء وكانت عندهم أسماء نساء، وفي العصر العباسي اشتهر مصطلح “الغلاميات” ودول إناث بيولوجيا كانوا بيحلقوا زي الرجالة ويرسموا شنب من المسك والعبير وكانت عندهم أسماء رجال.

اقرأوا أكتر في (تاريخنا الملون) هنا.

انطلقت هذه الحملة في شهر مايو لعام 2020 بالتعاون بين م مسلم وأطياف.

Gridlove

شروط الاستخدام
محتوى أطياف مرخص برخصة المشاع الإبداعي. يسمح بإعادة نشر المواد بشرط الإشارة إلى المصدر بواسطة رابط تشعبي، وعدم إجراء تغييرات على النص، وعدم استخدامه لأغراض تجارية.