تطبيقات المواعدة زي جرايندر Grindr وتندر Tinder وغيرها بقت جزء أساسي من حياة ناس كتير من أفراد مجتمعات الميم في الشرق الأوسط وشمال أفريقيا والعالم، خصوصًا مع محدودية المساحات الآمنة في الواقع. لكن للأسف، في منطقتنا، استخدام التطبيقات دي محفوف بالمخاطر، عشان كده مهم كل حد هيستخدم التطبيقات أو البرامج دي يكون عارف ايه اللي هيتوقعه عليها.
مخاطر تطبيقات المواعدة بتتنوع بين ابتزاز جنسي ومالي أو تهديدات عامة وتتبع وتصيد وانتهاك للخصوصية والتشهير بنشر معلومات خاصة والتحرش والتنمر والوصم الإلكتروني.
أخطر ناس موجودين على التطبيقات هما الشرطة وخاصة شرطة الأداب أو الأخلاق حسب مسمياتها المختلفة في دول المنطقة، بتتبع المثليين عشان تسجنهم لأن عندها قوانين بتلزمها تعمل ده أو لأنها بتعمل ده من منطلق الممارسة والتعود رغم عدم وجود قوانين تلزمها. وده بيحصل تقريبا في كل دول المنطقة وأفريقيا زي مصر وتونس ولبنان والمغرب وقطر والجزائر والكويت وسوريا والسعودية والعراق.
بعد كده، بيجي العصابات واللصوص وده بيستهدفوا المثليين بالتحديد لسهولة ده وعدم لجوء ضحاياهم أغلب الأوقات للشرطة خوفًا من التنكيل القانوني، ولسهولة تبرير السرقة والاعتداءات على أشخاص بيتشافوا من عدد كبير من المجتمع إنهم ضد “الدين” و”الأخلاق” أو أيًا يكن المبرر.
كمان التحرش والتنمر والوصم الإلكتروني على تطبيقات المواعدة بيحصل بشكل كبير وبيكون من المثليين أنفسهم. خاصة إن تطبيقات المواعدة مبتوفرش حماية كبيرة أو استجابة سريعة لو حد بلغ عن حساب (بروفايل) بيعمل أي انتهاك من السابق ذكرهم وغالبًا لأن التطبيقات مفيهاش موظفين بيفهموا اللغة العربية ولهجاتها.
هنتكلم في المقال ده عن خطوات واضحة وسهلة تقدروا تعملوها علشان تقللوا من المخاطر وتحموا أنفسكم قدر الإمكان.
اختيار صور الملف الشخصي بحذر
- تجنبوا الصور الواضحة: ما تحطوش صورة وشكم أو صور بتكشف هويتكم بسهولة زي إنها تظهر علامات واضحة في الجسم أو المكان المحيط.
- استخدموا صور رمزية أو غامضة أو أي حاجة مش بتكشف تفاصيلكم. تفاصيل الحساب
- ما تكتبوش اسمكم الحقيقي أو شغلكم أو دراستكم أو عنوانكم.
- استخدموا اسم مستعار.
- خلوا بياناتكم غامضة شوية، خصوصًا في الجزء الظاهر من الحساب (البروفايل).
تفعل خاصية “التحقق من الصورة” بحذر
بعض التطبيقات بتطلب صورة تأكيد لإثبات إنك شخص حقيقي. لو مش مرتاحين، حاولوا تتأكدوا إن الصور دي مش بتتحفظ أو تنتشر.
الرسائل والمحادثات
- خدوا وقتكم في المحادثة: قبل أي لقاء، اتكلموا كتير وخدوا وقتكم علشان تحسوا بالأمان وتختبروا إن الشخص اللي هتقابلوه أمان.
- اسألوا أسئلة للتأكد من الشخص: مين هو؟ إيه اللي بيدور عليه؟ لو كلامه غريب أو متناقض، دي علامة تحذير.
- ما تبعتوش صور حساسة أو خاصة، حتى لو حسيتوا بالأمان في البداية. الصور ممكن تُستخدم لاحقًا في الابتزاز.
لو عندكم إحساس إن في حاجة مش مظبوطة، صدقوا إحساسكم، لأن أمانكم وسلامتكم أولولية.
إعدادات الخصوصية
- فعّلوا خاصية إخفاء الموقع الجغرافي.
- تطبيقات زي جرايندر Grindr بتحدد موقعك بدقة، وده ممكن يستخدمه أي حد علشان يعرف أنت فين بالضبط.
لو قررتوا تقابلوا حد:
- اتقابلوا في مكان عام أول مرة.
- قولوا لحد قريب (صديق موثوق) عن مكانكم وتفاصيل الشخص اللي تساعدكم لو حصلت مشكلة.
- استخدموا وسيلة نقل آمنة (زي مترو، أو أوبر، أو تاكسي معروف).
- خلوا معاكم وسيلة للهروب أو التواصل (موبايل مشحون أو شاحن محمول).
- خلوا معاكم فلوس قليلة تكفي الخروجة بالظبط ولو تليفونكوا غالي سيبوه في البيت وخدوا تليفون رخيص أو مش مهم ويكون خالي من أي صور أو معلومات تدخل على هويتكم الجنسية.
احذروا من الابتزاز الرقمي
- لو حد هددك بصور أو محادثات، ما تستجبش.
- احتفظوا بصور للمحادثات والتهديدات كأدلة.
- تقدروا تبلغوا منصة التطبيق أو جهة داعمة قانونية أو حقوقية لو متاحة وخاصة لو الموضوع تطور أو مش عارفين تتصرفوا ازاي.
اعرفوا حقوقكم
في بعض الدول، مجرد استخدام التطبيق مش جريمة، لكن التواصل أو اللقاء ممكن يتسبب في مشاكل قانونية. اعرفوا وضعكم القانوني أو استشيروا منظمات محلية مهتمة بحقوق مجتمعات الميم.
والأهم تعرفوا ازاي تحموا أنفسكم وتشاركوا المعلومات دي مع صحابكم ومعارفكم عشان يتجنبوا مصير سيئ، معلومة واحدة حقيقة ممكن تنقذهم منه. ومهم التأكد من المعلومات قبل نشرها، لأن القلق الجماعي أضراره أكتر من فوايده بكتير.
