تعتبر الأوقية الجنسية (معروفين بالأوقية الأنثوية والذكرية والفموية) الأدوات الأفضل على الإطلاق للحماية من كافة أنواع العدوى المنقولة جنسيًا. تختلف المواد المصنع منها الأوقية الذكرية. كما تختلف الأنواع والأحجام والنكهات والجودة والأسعار.
الدام (الواقي الأنثوي)
- بيتلبس جزء دائري واسع بيكون بره المهبل وجزء بيدخل جوا.
- مهم لو الطرف/الأطراف التانية فيه حاجة تمنعهمن من لبس الكاندوم، لكن طبعًا طالما ممتنعيت، الأفضل نتجنب الهارد سكس (الممارسات الإيلاجية).
ازاي نلبس الدام؟
الكاندوم (الواقي الذكري)
- مهم نعرف ازاي نلبسه صح عشان ده بيأثر على إنه يتقطع أو يتخلع.
- الكاندوم بيستخدم لشخص واحد (يلبسه شخص واحد ويدخل في شخص واحد) وبيتلبس قبل السكس مباشرة ولمرة واحدة ويستحسن لو يتغير بعد نصف ساعة لو فيه هارد سكس (الممارسات الإيلاجية).
- الكاندوم بيتلبس بردو على السكس تويز (الألعاب الجنسية) وبيتغير بين كل استخدام والآخر وكل شخص والآخر/يت.
- لو الكاندوم اتخلع أو اتقطع يتوقف السكس ويتغير.
ازاي نلبس الكاندوم؟
- افتحوا الكاندوم بعناية وطلعوه من تغليفته من غير ما تستخدموا مقص أو حاجة حادة عشان ميتقطعش
- حطوا الكاندوم على رأس القضيب المنتصب كويس واتأكدوا قبلها إنكوا حاطينه صح مش عاكسينه عشان يرول معاكوا
- فضوا الهوا من راس الكاندوم بصباعكوا
- افردوا/رولوا الكاندوم لأخر القضيب
- بعد السكس وقبل ما تطلعوا من جوا شركائكوا، امسكوا الكاندوم من الحلقة اللي في الآخر بايدكوا واطلعوا وانتو مثبتين الكاندوم
- شيلوا الكاندوم بالراحة واربطوه من آخره زي ما بتربطوا البلونة المنفوخة كده
- بعدين لفوه في منديل وارموه في سلة الزبالة وبلاش ترموه في التويلت أو أي مكان تاني
- بعدين تخلصوا من الزبالة في أسرع وقت زي أي مخلفات بشرية
الواقي الفموي (دينتال دام)
الواقي الفموي عبارة عن قطعة من اللاتكس أو البولي يوريثين بتتحط بين الفم والمهبل أو فتحة الشرج أثناء ممارسة الجنس الفموي. ممكن تلاقوها بتتابع على الإنترنت أو الصيدليات وممكن تعملوها من الكاندوم العادي.
ازاي نستخدم الواقي الفموي؟
الواقي الفموي بيكون عامل زي المنديل كده، بناخد نفرده على المهبل أو فتحة الشرج. والطرف التاني بيثبته بايده طول ما هما بيعملوا سكس فموي لحد ما يخلصوا. وبعد ما يخلصوا بيترمي. ولو عاوزيت نعمل سكس فموي تاني بيتغير. كمان لو الأدوار اتغيرت بيتغير الواقي الفموي. والواقي الفموي اللي مش هنستخدمه تاني بنتخلص منه علطول. هدف الواقي الفموي إن متتنقلش أي عدوى من فتحة الشرج أو المهبل للفم والعكس بأنه بيعزل بينهمن ولكن في نفس الوقت بيوصل الاستمتاع الجنسي.
ازاي نعمل واقي فموي من الكاندوم؟
بنفتح الكاندوم وبعد ما نفتحه نفرده ونقص راسه وبعدين نقص الحلقة اللي في أخره. بعدين بندخل المقص جواه ونقص بالطول ونفرده. ويكون عندنا واقي فموي عامل زي المنديل أو حتة القماش الصغيرة. ونفرده على المكان اللي هناكله وصحة وعافية.
المزلقات الجنسية والأوقية الجنسية
يفضل استخدام مزلقات مائية أو سيليكون، لأن المزلقات الزيتية ممكن تسبب تآكل وقطع في الدام و/أو الكاندوم وكمان ممكن تسبب التهاب في المهبل أو الشرج. يعني بلاش نستخدم فازلين أو زيت جونسون لأنهم مش معملوين للاستخدام الجنسي ومش مناسبين للشرج والمهبل.
الألعاب الجنسية والكاندوم
يفضل نستخدم كاندوم مع الألعاب الجنسية وبردو لو هنستخدم أي خضار زي الخيار والجزر كألعاب جنسية. لأن الألعاب الجنسية متكونش اتنضفت كويس. وكمان لو هنبدل الألعاب الجنسية مهم نغير الكاندوم وبعد ما نخلص لعب نرمي الكاندم في سلة الزبالة وممكن نلفه في منديل لو مش عاوزين حد يشوفه في السلة.
كمان الخضار ممكن يكون فيه بقايا مبديات حشرية حتى لو اتنضف كويس. المعدة بتقدر تتعامل مع البقايا دي بسبب الأحماض اللي فيها. لكن الشرج والمهبل مش هيقدروا يعملوا ده. فمهم نحميهم.
لو هنستخدم سكس تويز (ألعاب جنسية) سيليكون بلاش كاندوم سيليكون لأن هيتسبب في تآكلها.
الأوقية الجنسية في مصر
في أنواع كتيرة مختلفة للأوقية الجنسية في مصر خاصة الكاندوم. لكن ممكن تواجهوا صعوبة في إنكوا تلاقوا دام (واقي أنثوي) أو واقي فموي (دينتال دام). الدام لما بيكون متاح عادة بيكون في الصيدليات الكبيرة زي العزبي ودلمار وسيف وغيرهم. كذلك الواقي الفموي.
بالنسبة للكاندوم، في أنواع كتيرة منتشرة زي ديوركس وفيسستا وسمبلكس، وفي أنواع تانية أقل شهرة زي سُترة ووان تاتش وريتكس وبراندات تانية.
ديوركس ورايتكس يعتبروا الأغلى بيبدأو من 60 لحد 170 جنيه بالنسبة لديوركس 3 قطع. . وفيستا وسمبلكس سعرهم رخيص وجودتهم كويسة بتبدأ من 25 لـ 30 جنيه مصر للتلات قطع كاندوم وفي صيدليات بتبيعهم بأسعار أغلى من كده.
بيكون في نكهات مختلفة كمان عشان الجنس الفموي للأشخاص اللي بيحبوا يعملوا بولوجوب مع وجود الكاندوم.
