الموافقة الرضائية المستنيرة

يعني ايه موافقة رضائية مستنيرة؟

الموافقة الرضائية المستنيرة أو الكونسنت Consent هي إن الناس يعبروا عن موافقهمن بإنهمن يعملوا سكس أو حاجة جنسية معينة أو أي حاجة بتشمل الجسد والتواصل بداية من لمس الايد والجسم والبوس لحد السكس الكامل. ونكون شاركنا كل المعلومات اللي تهم الناس اللي معانا مرتبطة بالتواصل والعلاقة، خاصة لو احنا عارفين المعلومات ممكن تأثر في قرارهمن بالموافقة.

مهم ناخد الموافقة الرضائية والمستنيرة من قبل بداية أي فعل جنسي أو عاطفي ممتع حتى لو لمسة، ويكون من جميع الأطراف ويكونوا الأشخاص في العلاقة مؤهليت وواعيت وفي كامل قواهمن العقلية.

 يعني مهم الناس ميكونوش واخديت مخدر معين أو سكرانيت، أو واخديت أدوية بتأثر على تركيزهمن ووعيهمن. ولو الناس تحت سن البلوغ اللي هو 18 سنة فالموافقة بتاعتهمن ملهاش قيمة لو الطرف أو الأطراف التانية ناس فوق سن البلوغ أو سن الرشد.

ومسألة سن البلوغ دي فيها نقاشات كتير وتعتبر جدلية ولكن فرص إن الأشخاص تحت السن يتعرضوا لمشاكل جسدية أو نفسية بسبب موازين القوة المرتبطة بفرق السن أو الخبرة والمعرفة بتكون عالية. والمشاكل ممكن تأثر عليهمن لأوقات كتير جاية في عمرهمن لحد ما يقدروا يتخطوها. عشان كده مهم الناس البالغة فوق 18 سنة يتجنبوا أي تواصل عاطفي أو جنسي مع القاصريت تحت 18 سنة. وينصحوهمن إن يستكشفوا عاطفتهمن وجنسانيتهمن مع أشخاص في نفس سنهمن أو تحت سن البلوغ بردو.

التراجع عن الموافقة

الموافقة المستنيرة ممكن تتسحب في أي وقت ومش شرط إبداء سبب لدا. بغض النظر عن بداية أو مسار العلاقة كان ماشي ازاي وحتى لو في علاقة من سنين لازم يتجدد طول الوقت. وفي أسباب كتيرة ومعقدة بتلعب دور في تراجع الناس عن الموافقة أو انعدام الرغبة في الانخراط في أي نشاط عاطفي أو جنسي. زي الحالة النفسية والمشاعر العاطفية أو إن السبب ميكونش معروف. 

كل خطوة يلزمها موافقة

التصريح بيتم في كل خطوة أو فعل، يعني لو التصريح عن لمسة مثلاً أو بوسة، مينفعش يتجاوز دا إلا بموافقة مستنيرة. يعني لو قولنا لحد إننا حابيت نبوسهمن بعد ما سألونا، مينفعش يعتبروا ردنا موافقة على إنهمن يلمسوا أعضائنا الجنسية. لأن كل خطوة وحركة يلزمها موافقة من الطرف أو الأطراف التانية.

لا يعني لا من غير زعل

لا يعني لا، والسكوت مش علامة الرضا، ولا أي حاجة من الحاجات الكتير اللي بتتقال عن إن الموافقة ممكن تعدي من غير ما الناس يقولوا بشكل واضح وصريح مظبوطة. والموافقة لازم تكون موجودة طول الوقت، وانتوا اللي تقدروا تحددوا إذا كان حصل انتهاك لده ولا لا.

والكلام عن اللي بنحبه واللي مبنحبوش قبل السكس خاصة لو مع ناس بنام معاهمن لأول مرة هيفرق كتير وهيخلي التجربة أفضل وأفضل عشان كل جسم بيختلف عن التاني وكل حد الحاجات اللي بيحبها وبتبسطه بتختلف عن التاني. والعلاقات حتى لو عابرة بتحلى وتحلى بالكلام والتواصل.

ولا مش معاناها إن الشخص أو الأشخاص مش بيحبونا أو مش عاوزينا لو احنا سوا. ومش معاناه إننا كنا مش كويسيت لو لا جت من ناس عاوزيت نكون معاهمن. لو عندنا مشكلة مع تقبل الرفض الجزئي أو الكلي ممكن نحاول نشتغل على ده لحد ما نكون نستقبله بنفس السلاسة اللي بنستقبل بيها الموافقة. ونعرف إننا ممكن نترفض من ناس ولكن قيمتنا وكل ما يخصنا هيفضل زي ما هو مش هيتجرح.

الموافقة الرضاية المستنيرة مهمة عشان بتحمينا وبتحمي الناس اللي معانا من إنهمن يتعرضوا لأي حاجة ممكن تأذيهمن وتكون سبب في إن حياتهمن تتأثر بحاجة عنيفة أو محترمتهمش ولا احترمت جسمهمن ورغبتهمن وإن الشخص أو الأشخاص اللي كانوا معاهمن مهتموش يتواصلوا معاهمن ويفهموا هما يناسبهمن ايه وايه يبسطهمن ويريحهمن والكل يكون مبسوط في التجربة الحميمية أو الجنسية دي.

عشان نلخص كلامنا

خمسة ميم يتعدوا ع الأيد!

1. متقدمة بحرية
2. ممكن تتسحب
3. مستنيرة
4. متحمسة
5. مخصصة ومحددة