يعني ايه «اعرفونا»؟
اعرفونا دي حملة بتطلقها أطياف، وهتكون مستمرة، يعني بتنشر محتوى متجدد مع تجدد الأسئلة. عشان توضح الصور النمطية والمعلومات الغلط المنتشرة بين المغايرين والسيزجندر (الناس اللي مش من مجتمعات الميم) عن المثليين والترانس وكل فئات مجتمعات الميم.
ليه «اعرفونا»؟
عشان لاحظنا إن أصحابنا وعائلاتنا والناس اللي حوالينا بيقولوا كلام مش دقيق لما بتيجي سيرة المثليين والترانس. خاصة مع الحملات اللي بتطلع من وقت للتاني سواء كورة أو فيلم جديد أو ديزني أو أي حاجة فيها موضوع المثليين والترانس ومجتمعات الميم. عارفين إن الكلام المش مظبوط حوالينا ده قديم، ولكن دلوقتي، مع وجود الإنترنت وقدرة ناس كتير إنها توصل لمعلومات عن اللي كانت بتسمعه، إلا إن المشكلة الجديدة، إن في ناس مُصرة تكتب وتنشر معلومات غلط عننا، وكأنهم يعرفونا أكتر مننا.
«اعرفونا» بتكلم مين؟
كل المغايرين والسيزجندر (الناس اللي مش من مجتمعات الميم). والناس من مجتمعات الميم اللي لسة ببيكتشفوا هويتهم وعاوزين يعرفوا أكتر عن نفسهم. عشان هننشر حاجات عن الميول الجنسية والهوية الجندرية ومعلومات عن أساسيات مختلفة تخص مجتمعات الميم وحياتهم.
«اعرفونا» بتشتغل ازاي؟
هنعتمد على الأسئلة اللي بتوصلنا بشكل مباشر على منصاتنا المختلفة. أو الأسئلة والحاجات اللي بتتقال على السوشيال ميديا أو اللي الحاجات اللي بتتسأل لجوجل ومحركات بحث مختلفة. وكمان هننشر دعوة للناس تبعتلنا الأسئلة اللي بتيجي على بالها حوالين مجتمعات الميم سواء هما من مجتمعات الميم أو لا.
شوية حاجات كده
احنا بنكتب في اعرفونا باللغة المصرية الحديثة، عشان أغلب الأسئلة اللي وصلتنا، وأغلب الناس اللي مهتمة تعرف عن مجتمعات الميم، بتتكلم اللغة المصرية الحديثة. وعشان اللغة المصرية الحديثة مفهومة بشكل كبير بين نسبة كبيرة من سكان شمال أفريقيا والشرق الأوسط.
وبنحلم من خلال الحملة دي، إنها تفتح فرصة ومساحة نشوف ونتعامل مع آراء مختلفة ولكنها صادقة وحقيقية وجاية من تجارب بيعشها ناس كتير من مجتمعات الميم. وإن ناس كتير من اللي مكانتش بتواجه أفكارها اللي اتبنت على كراهية وحكم مسبق وافتراضات ولدها الخوف وقلة المعرفة، إنها تبدأ تعمل ده، وتشوف مجتمعات الميم بشكلهم الحقيقي بعيدًا عن الشيطنة والهيستريا.
