صحتنا كلنا هي حملة انطلقت في الأول من ديسمبر لعام 2021 بمناسبة اليوم العالمي للإيدز بالتعاون بين أطياف ورفوف وصالون ومنا وفينا وم مسلم وLGBT بالعربي على فيسبوك وتويتر وانستجرام عن الخدمات الصحية الخاصة بالمتعايشين في مصر والفئات المتعايشة الأكثر تهميشًا.
وصلنا لفين في علاج الإيدز وفيروس نقص المناعة؟
من الثمانينات والمجتمع الطبي شغال على تطوير لقاحات للوقاية والعلاج من فيروس نقص المناعة المكتسب HIV، وبالرغم من التطور اللي حصل على مستوى الأدوية للسيطرة على تضاعف الفيروس داخل جسم العائل/ة لكن مجال اللقاحات لسة بيخطو خطواته الاولى، والسبب هو سرعة تحور الفيروس، بالرغم من ده التجارب لسة مستمرة، وحالياً مصنعي الادوية والمراكز البحثية شغالة على محورين؛ اللقاحات الوقائية واللقاحات العلاجية.
لحد النهاردة إدارة الغذاء والدواء الأمريكية مرخصتش اي لقاح وقائي لفيروس نقص المناعة المكتسب HIV ولكن في السنين الأخيرة بدأ عدد من التجارب السريرية.
اما اللقاحات العلاجية الي بتشتغل على تحسين الاستجابة المناعية للجسم ضد فيروس نقص المناعة المكتسب لدى الشخص الحامل/ة او المتعايش/ة مع الفيروس بحيث ميتطورش لمتلازمة نقص المناعة المكتسب AIDS، ويحافظ على انتشار الفيروس تحت مستويات الأكتشاف وبالتبعية بيقلل جداً احتمالية انتقال الفيروس لأشخاص آخرين.
مع الأسف لسة التجارب السريرية على النوع ده من اللقاحات في بدايتها.
*هذه المعلومات حسب مكتب أبحاث الإيدز التابع للمعاهد الوطنية للصحة (الولايات المتحدة الأمريكية)
نجيب العلاج منين في مصر؟
الحكومة بتوفر العلاج مجانًا في مستشفيات الحميات زي حميات العباسية وإمبابة واسكندرية والمنصورة وغيرهم. ولكن لو مش عاوزين العلاج الحكومي، ممكن نجيبه من الصيدليات الكبيرة وأوقات بيكون موجود أونلاين على تطبيقات الأدوية.
نجيب البريب والبيب منين؟
البريب PrEP ده علاج وقائي، بيتاخد بشكل يومي للوقاية من فيروس نقص المناعة. البيب PEP ده علاج بيتاخد خلال 72 من احتمالية التعرض للإصابة وبشكل يومي لمدة شهر.
ممكن نجيبه من الصيدليات الكبيرة وأوقات بيكون موجود أونلاين على تطبيقات الأدوية. تكلفته تقريبًا حوالي 1000 جنيه مصري.
المتعايشين فين من المبادرات الصحية الحكومية؟
رغم إن الحكومة المصرية نظمت خلال الكام سنة اللي فاتوا مبادرات صحية كتيرة استهدفت ملايين المصريين، إلا أن مفيش ولا مبادرة ركزت على المتعايشين وفيروس نقص المناعى غير مبادرة صحة الأم والجنين، عشان تضمن عدم انتقال الفيروس من الأم المتعايشة للجنين، ودي خطوة مهمة في رحلة مصر ضد فيروس نقص المناعة واللي بدأت في التمانينات، ولكن الحكومات القديمة كانت بتتحرك فيها ببطئ، لكن حاليا قدامنا فرصة عظيمة في مكافحة الفيروس من خلال تعميم الكشف عنه في كل المبادرات الصحية خاصةً مع النقلة اللي بيشهدها القطاع الصحي والبنية الصحية في مصر.
أماكن الفحص والمشورة في مصر
تتوزع أماكن الفحص والمشورة المركزية التابعة لوزارة الصحة والتي تقدم الفحص والمشورة مجانًا بعدد 17 مركز على 17 محافظة فقط. كما تقول وزاة الصحة أنها توفر الفحص والمشورة لفيروس نقص المناعة ومرض الإيدز في 44 مركزًا في جميع محافظات مصر بالمستشفيات النفسية ومستشفى الحميات بكل محافظة دون تحديد أسمائها وعناوينها.
- الشرقية: مركز طبي النحال بشارع خالد بن الوليد بمدينة الزقازيق.
- الإسكندرية: مستشفى حميات الإسكندرية.
- كفر الشيخ: مستشفى كفر الشيخ العام أسفل بنك الدم الرئيسي.
- بنى سويف: شارع عبدالسلام عارف بجوار حضانة الصفا بعمارات الشرطة.
- أسيوط: عمارة 6 بمساكن عزبة السجن بالوليدية.
- الغربية: طنطا بشارع طه الحكيم بمستشفى الحميات بالدور الثالث.
- البحر الأحمر: مديرية الصحة والسكان بحفر الباطن بمدينة الغردقة.
- القاهرة: 19 شارع الشيخ ريحان باب اللوق بميدان التحرير، ومركز المشورة بمستشفى حميات العباسية.
- دمياط: مستشفى حميات دمياط.
- القليوبية: مستشفى حميات بنها.
- الجيزة: مركز صحة ميت عقبة بشارع السودان أمام مستشفى سوزان مبارك الدور الثالث.
- جنوب سيناء: المركز الحضرى بالرويسات بمدينة شرم الشيخ.
- البحيرة: المركز الطبي بأبو الريش بعزبة سعد الدور الثالث بدمنهور.
- الدقهلية: خلف مستشفى الصدر.
- أسوان: المركز الطبي بالنفق.
- الإسماعيلية: حميات الإسماعيلية.
- المنوفية: شبين الكوم بالمساكن بجوار المرور القديم بأعلى رعاية طفل بحري.
ويمكن معرفة أماكن الفحص والمشورة المجانية بالتواصل على خدمة الخط الساخن التي توفرها وزارة الصحة والسكان على أرقام (33152802) و(33152801) و(08007008000) لمعرفة أقرب مكان للتحليل بسرية تامة دون الكشف عن رقم المتصل.
مراكز للفحص والمشورة في السجون الجديدة في مصر
أعلنت وزاة الداخلية المصرية في أكتوبر 2021 عن تخصيص مركزًا للفحص والمشورة للأشخاص المتعايشين مع فيروس نقص المناعة ومرض الإيدز ضمن المستشفى المركزي داخل السجون الجديدة أو اللي بتسميها الوزاة مراكز الإصلاح والتأهيل واللي هتستبدل السجون المصرية القديمة بالكامل حسب خطة حكومية هتنتهي في 2026. هتكون السجون القديمة كلها اتقفلت ومراكز الإصلاح والتأهيل اشتغلت. مفيش بيانات معلنة عن طبيعة التعامل وازاي الوزارة هتضمن ميحصلش إفصاح لحالة المتعايشين زي ما حصل قبل كده. الخطوة دي مهمة جدًا وهتفرق مع كل المتعايشين مع فيروس نقص المناعة ومرض الإيدز داخل السجون في كل مكان في مصر، من حيث إنهم هلاقوا علاج مستمر وكمان أطباء لاستشارتهم أو الكشف عن أي مضاعفات
الفحص والمشورة في المبادرات الحكومية الصحية
مبادرة 100 مليون صحة اللي تعتبر أكبر مبادرة فحص طبي اتعمل في مصر، 60 مليون حد عملوا فحوصات من خلالها، لو كان تم إضافة تحليل فيروس نقص المناعة كان هيفرق في إن ناس كتير كانت هتعرف حالتها، زي ما فرق مع فيروس سي، واللي بسبب المبادرة دي مصر قدرت تحتويه تمامًا. الحكومة تداركت ده في مبادرة صحة الأم، اللي بتستهدف النساء الحوامل، وفيها فحص فيروس نقص المناعة، ووزارة الصحة قالت إن إضافة التحليل ده الهدف منه كان إن مصر توصل لصفر إصابة للأطفال تحت 5 سنين. كان هيبقى مهم إن تحليل فيروس نقص المناعة يتضاف في مبادرة 100 مليون صحة أو أي مبادرات صحية جاية وقوافل مبادرة حياة كريمة الطبية، لإنها قادرة توصل لأشخاص في مدن وقرى كتير جدًا وده كان هيساعد يعمل فحص لأكبر عدد ممكن من الناس في مصر ومعرفة حالتهم كانت هتساعدهم ياخدوا العلاج بدري. وطبعًا إن ده يحصل محتاج خطوات تضمن ميكونش في وصم وتمييز.
ايه اتغير عن أسماء؟
فيلم أسماء (إنتاج 2011) من أهم الأفلام اللي عرضت المشاكل اللي بيعاني منها المتعايشات/ين مع فيروس نقص المناعة HIV في مصر، وعلشان نشوف احنا فين بعد 10 سنين من عرض فيلم أسماء بنسأل سؤال ايه اللي كان ممكن يتغير في الفيلم لو أحداثه كانت في 2021! هنجاوب هنا عن السؤال ده.
كان مسعد وهو في مركز التأهيل والإصلاح (السجن) هيلاقي وحدة للفحص والمشورة للأمراض المناعية المنقولة زي فيروس نقص المناعة HIV.
المتعايشات الراغبات في الإنجاب
أسماء كانت هتلاقي مراكز للصحة الإنجابية تساعدها تحمي نفسها وجنينها ضمن المبادرة الصحية الحكومية للمتعايشات الراغبات في الإنجاب، وكانت هتلاقي في مبادرة صحة الأم والجنين متابعة كاملة لصحتها ولمولودها خلال الولادة ولمدة ٤٢ يوم بعدها عشان متتعرضش هي وطفلها لأي مضاعفات صحية بعد الولادة.
الخدمات الصحية
أسماء كانت هتقدر توصل لمستشفى حكومي مخصص لتقديم الخدمات الطبية للمتعايشات/ين مع فيروس نقص المناعة، وكانت هتقدر تلاقي الدعم والمشورة والادوية اللي محتاجاها ضمن الاستراتيجية الوطنية لمكافحة انتشار مرض الإيدز AIDS.
التمييز ضد المتعايشات/ين
مع الأسف حتى في 2021 أسماء كان ممكن تخسر وظيفتها بعد ما يتعرف إنها متعايشة مع فيروس نقص المناعة ولحد النهاردة مفيش قوانين تضمن الحماية للمتعايشات/ين من التمييز في أماكن العمل.
