مجتمعات أو مجتمع الميم هما المثليات والمثليين ومزدوجي الميول الجنسية والمتحولين جنسيًا (أو مغايري النوع أو مصححي الجنس). المصطلح اختصار للكلمات دي بإنه أخد أول حرف في كل كلمة، وهو حرف الميم. فبقى مجتمع أو مجتمعات الميم.
ولكن حصل شوية تطورات على المصطلح جت من نقاشات وآراء وكلام كتير. زي إن مجتمع الترانس رفض استخدام مصطلح «متحولين جنسيًا» عشان دلالته والطريقة اللي بقى بيستخدم بيها بتهين الناس الترانس ومش بتعبر عنهم. ونتيجة ده، بقى المصطلح «مجتمع/مجتمعات الميم عين» أو «مجتمع/مجتمعات الميم عين+» وعلامة الزائد هنا بتعبر عن كل الفئات اللي مش مذكورة في المصطلحين زي اللاجنسيين وبينيي الجنس (الإنترسكس) مثلاً.
ناخد بالنا
المصطلح في الأساس اتحط عشان يشير لمجتمعات التوجهات الجنسية والهويات الجندرية المختلفة عشان الثقافات المشتركة والحركات الاجتماعية والسياسية والمنظمات اللي بتعبر عن حقوقهم ومطالبهم.
لكن ده مش معناه إن كل الفئات دي مشكلتها واحدة ولا الحاجات اللي محتجاها أو بتطالب بيها واحدة، وعشان كده في ناس بتقول «مجتمعات الميم» عشان توجه إن المجموعة فيها مجتمعات مش مجتمع واحد شبه بعضه.
وده مش معناه كمان إن كل الناس المثليين أو الترانس أو مزدوجي التوجه الجنسي عاوزين يكونوا جزء من مجتمع الميم أو بيحسوا إنهم جزء من مجموعة كبيرة لمجرد إن هوياتهم الجنسية مشتركة أو تجربتهم الحيايتة ممكن تكون شبه بعض في حاجات.
المصطلح المكافئ لـ مجتمع أو مجتمعات الميم بالإنجليزية واللي بقى بيتسخدم في لغات كتير زي ما هو حول العالم زي الفرنسية والإسبانية ولغات آسيوية وأفريقية LGBT أو LGBTQ+ أو LGBTQIA+ حسب المشتقات المختلفة.
