مجتمع الميم هما المثليات والمثليون ومزدوجي الميول الجنسية والمتحولين جنسيًا. المصطلح اختصار للكلمات دي بإنه أخد أول حرف في كل كلمة، وهو حرف الميم. فبقى مجتمع الميم.
ولكن حصل شوية تطورات على المصطلح جت من نقاشات وآراء وكلام كتير. زي إن مجتمع الترانس رفض استخدام مصطلح «متحولين جنسيًا» عشان دلالته والطريقة اللي بقى بيستخدم بيها بتهين الناس الترانس ومش بتعبر عنهم. ونتيجة ده، بقى المصطلح «مجتمع الميم عين» أو «مجتمع الميم عين+» وعلامة الزائد هنا بتعبر عن كل الفئات اللي مش مذكورة في المصطلحين زي اللاجنسيين وبينيي الجنس مثلاً.
ناخد بالنا
المصطلح في الأساس اتحط عشان يشير لمجتمعات التوجهات الجنسية والهويات الجندرية المختلفة عشان الثقافات المشتركة والحركات الاجتماعية والسياسية والمنظمات الداعمة ليهم.
لكن ده مش معناه إن كل الفئات دي مشكلتها واحدة ولا الحاجات اللي محتاجها واحدة، وعشان كده في ناس بتقول «مجتمعات الميم» عشان توجه إن المجموعة فيها مجتمعات مش مجتمع واحد شبه بعضه. ومش معناه كمان إن كل الناس المثليين أو الترانس أو مزدوجي التوجه الجنسي عاوزين يكونوا جزء من مجتمع الميم أو بيحسوا إنهم جزء من مجموعة كبيرة لمجرد إن هوياتهم الجنسية مشتركة أو تجربتهم الحيايتة ممكن تكون شبه بعض في حاجات.
